• يارا اسامة
• 12:00 AM - 3 July 2012
• My Other Reviews

في البداية أحب اقول إن أنا مش ناقدة فنية, أنا مجرد مشاهدة عادية جدا قررت اني أدخل السينما بعد حالة الإحباط اللي جاتلي بعد معرفة نتائج الانتخابات الرئاسية. المهم دخلت الفيلم بعد ما شفت الإعلانات بتاعة الفيلم والكلام اللي سمعته عنه انه فيلم جامد، وطبعا بعد ما عرفت إن الفيلم من بطولة اتنين من أجمد الممثلين في مصر –أحمد عز وأحمد السقا-. الفيلم في المجمل كان جميل لكن كان عندي بعض الملاحظات اللي لقتها في الفيلم منها الحلو ومنها الوحش، نبدأ بالوحش الاول؟! 1-الصراحة الفيلم معجبنيش أوي ......يمكن عشان انا كنت متوقعة انه هيبقى احلى من كده بكتيير يمكن!!؟. 2-الفيلم كان فيه احداث كتيير مش منطقية و مكنش ليها اي تلاتين لازمة-بس مش هقولها عشان محرقش الفيلم عليكوا-. 3-الأدوار النسائية كان مهدور حقها جدااااا في الفيلم ده, الفيلم تقريبا بيدور حولين شخصية السقا وعز مع العديد من الأدوار الهامشية. 4-زينة طبعا مش هقدر اتكلم عن دورها في الفيلم عشان هي مكنتش بتمثل اساسا!,

أما الأشياء الحلوة 1-اكتر حاجة شدتني في الفيلم ده كانت التصوير والأماكن اللي تم التصوير فيها بجد كانت تحفة و الإنسان اللي صور الفيلم ده بجد استاذ و رئيس قسم كمان.
2-الفيلم باين عليه متكلف ومعمول بدماغ عالية اوي بالذات مشاهد الاكشن 3-احمد السقا......كان جامد وتمثيله كان حلو اووووي, بس مكنتش حاسة ان الدور كان جديد عليه كان دور عادي. 4أحمد عز......الصراحة كان أحلى دور في الفيلم وعجبني أكتر من السقا وأكتر واحد شدني دوره مش لأنه مثل أحسن من بقية الممثلين ...لأ,لكن عشان الدور كان جديد أوي عليه -فدي اول مرة يعمل فيها دور تاجر مخدرات- و كان دمه زي العسل في الفيلم وهوا اللي كان بيضحك في الفيلم. 5-صلاح عبد الله.....بصوا الراجل ده انا بحبه من الله في لله,عنده طريقة وكاريزما هتخليك تحبه اوووي, وادى دوره حلو في الفيلم وكان عامل فريق حلو مع عز. 6-محمد فراج.......تمثيله اكتر من رائع وبجد هيخليك تحس انه بدوي و عايش طول عمره في سيناء,بجد الممثل ده ليه مستقبل كبير . 7-احمد السعدني.....كان كويس بس الدور مش جديد عليه,ومتعايشناش مع الشخصية بتاعته عشان مات في اول الفيلم. 8-كندة علوش ......ده اول فيلم اتفرج عليه لكندة بس الصراحة كانت حلوة اوي مع ان دورها ماكنش كبير, ودلعها في الشخصية اللي كانت بتأديها كان دلع حلو مش دلع ماسخ زي دلع هيفاء وقمر. 9-حنان ترك.....مع ان دورها بردو مكنش كبير الا انك هتحبها جدا . 10-النهاية بجد هي احلى حاجة في الفيلم ,كانت جميلة جدا. في الاخر احب اقولكم ان الفيلم جميل يمكن مش ممتاز لكنه جميل وهيعجبكوا.

• 3 helpful
• 0 not helpful