كاتنيس إفردين و وائل غنيم ومليار دولار إضافيه

لو خيروا أي منتج بين فيلم جامد وفيلمين كويسين يحققوا ضعف ايرادات الفيلم الواحد اكيد هيختار ده ومش هيعمل أي اعتبار انه كان ممكن يطلع فيلم احسن فنيا ، وده الخيار ال اخده المنتج هنا زي بالظبط هاري بوتر وتويليت ال اتقسم فيهم الجزء الأخير لنصين ،وبالنظر لاكتساح الفيلم حاليا للبوكس اوفيس واحتمالية انه يحقق مليار عالميا فليه لأ ميتعملش جزأ أخير ده طبعا أثر كتير على جودة الفيلم والمتابع للسلسه هيحس بانخفاض ملحوظ عن الجزء الثاني ، فرصة الملل هنا أكبر ومشاهد الحشو كتير ،زائد ان فرصة انهاء صراع أو خلق صراع جديد مش موجوده عكس الجزئين الي فاتوا الي كل واحد فيهم انتهى بصراع قديم يخلص وصراع جديد يتولد . التمثيل : طبعا جنيفر ممثله هايله رغم سنها الصغير لكن في حاجه تانيه مميزاها ، دعوة "ربنا يحبب فيك خلقه" بتنطبق عمليا عليها ، تعابير وشها لما تضحك أو تبكي بتأثر في المشاهد علطول ده غير المفاجأة بقا ان صوتها كمان حلو لما بتغني في الفيلم أنا افتكرت ان أديل ال بتغني . وودي هاريلسون "هايمتش " دوره مبتور في الفيلم من رغم انه من مميزات السلسه بخفة دمه وتعليقاته ، لكن ايفي المرحه بتعوض غيابه بتعليقاتها البسيطه العميقه في نفس الوقت " دي بقت موضه قديمه زي الديموقراطيه " احد تعليقاتها الجميله في الفيلم ،تواجد معقول للراحل "فيليب هوفمان " الي استغربت اوي من حجم دوره واستغربت اكتر اما عرفت انه هيبقا موجود ف الجزء الأخير ، الموسيقى جميله ومتسقه مع الفيلم وفي استغلال لصوت الطائر المكنجاي بشكل موفق معرفش ليه وأنا بتفرج لقيت نفسي اوتوماتيك بفكر في تأثير الإعلام على الناس وزي ما عندنا قنوات ونشطاء بيهللوا لتيار في قنوات ونشطاء تانين بيهللوا لتيار مضاد وده شبه حصل لما بقا بيتا وكاتنيس وجهين للإعلام والإعلام المضاد ، لقيت نفسي برضه بربط بين كاتنيس وبين النشطاء المصريين وافتكرت وائل غنيم تحديدا وقارنت بين الاتنين الاتنين عملوا حاجه مختلفه مهدت للثوره هما نفسهم مكنوش يتخيلوا حدوثها ، كاتنيس دمرت الألعاب وهو عمل صفحة خالد سعيد الي لفت الفيس كله عليها وكان ليها دور في نزول المظاهرات ، وافتكر دلوقتي لقاء منى الشاذلي معاه لما عيط وعيط مصر كلها معاه وافتكر برضه كاتنيس وهيا بتعيط وبتلم أهالي المقاطعات معاها ،لكن الفرق واضح بين الاتنين كاتنيس هتكسب قضيتها في النهايه أو على الأقل هتحافظ على احترام الناس ليها للنهايه واسترجع هنا مشهد قوي اوي في الفيلم لما تبعت الرئيسه كاتنيس لمصابين المقاطعه 8 عشان تطمنهم ويشوفوها وفي نفس الوقت يتم تصوير ده اعلاميا وبثه على الشاشات عشان يتحقق اكبر استفاده لكن كاتنيس ببساطه بتقول " متصورش حاجه . انا مش هقدر اساعدهم " كاتنيس الشخصيه الثابته بارتجالها وانفعالتها السريعه واعمالها غير المحسوبه ، كاتنيس ال رفضت تبقى مع النظام وتتنعم في نعيمه ورفضت تلعب دور المعارض الحنجوري الي بيتاجر بهموم العامه وهو غارق في التمويلات الفيلم كويس ويستحق يتشاف رغم بعض الثغرات المزعجة (تدمير السد - تحرير بيتا) والجزء الأخير اكيد هيبقا احسن.

Copyright © Damlag S.A.E
Owned by DAMLAG S.A.E: