• Abdelrahman Mohammed
• 09:22 AM - 7 September 2017
• My Other Reviews

مناقشة و مراجعة فيلم الخلية .

فيلم الخلية فيلم درامي اكشن جيد جدا عالمستوى الفني و جيد الى حد ما عالمستوى التقني و تفرق اني ذكرت كلمة دراما قبل الاكشن لان الجزء الطاغي في الفيلم هي دراما الاكشن مش مشاهد الاكشن .. يعني لو ذكرنا فيلم هروب اضطراري كمقارنة للموضوع ده مثلا لانه اخر فيلم اكشن نزل مصر قبل الخلية مش لاي حاجة تانية هنقول عليه فيلم اكشن فقط لانه اهمل الدراما و مقوماته الفنية بمزاجه و ركز انه يشبعك مشاهد اكشن .

السيناريو : بشكل عام جيد السيناريو عرفنا على الشخصيات و دوافعهم و اسلوبهم بشكل سهل جدا بسيط جدا مخدش وقت طويل و مش متكروت .. حتى التحولات لكل شخصيات الفيلم لحد قبل ( الربع الاخير ) من الفيلم كانت تقريبا ممتازة رسم كاراكتارات الشخصيات و تفاصيلها هايل , حبكة و فكرة الفيلم بسيطة جدا عبارة عن خيط رفيع السيناريست صلاح الجهيني محملش الفيلم ما لا يتحمله والا الخيط ده كان هيتقطع , لكن ازاي سيناريو عمل كل ده ييجي في الربع الاخير تقريبا يهد اللي بناه قرارات و تصرفات غير منطقية من الشخصيات اللي احنا عرفنا دوافعها و متوقعين هتتصرف ازاي لان ده اللي انت فرضتوا على الفيلم مش احنا .. فجأة الشخصيات بتتصرف بطريقة معاكسة تماما ليهم و من غير اي مبرر واحد ! .. سيناريو الخلية عامل زي اللي قفل كويزات و ميدتيرم و شال فاينال !

الحوار : بشكل عام جيد جدا و التقييم ده عشان الحوار الكوميدي الرائع و ثنائيات عز و تايسون الفيلم فيه كوميديا هايلة و الافضل منها هو توظيفها العبقري اللي موصلهاش لمرحلة الافورة او السماجة خصوصا انها كانت ممكن تتقال في اوقات مظلمة بعض الشئ لشخصيات الفيلم و الحوار العام مكنش فيه مشاكل .. لكن برضوا في الربع الاخير تحول الحوار الى رسائل مباشرة كليشيهية جدا و خطابية جدا .

الاداء التمثيلي : بشكل عام ممتاز كلهم كويسين , احمد عز تقريبا في افضل ادواره بيقدم استغلال مبهر لدور كان ممكن يتكروت او يتعمل اقل من كده و مكنش حد هيحس بحاجة .. استعداد جسماني رائع اجتهاد و تطور في ادائه انا اول مرة اشوفه ياخونا عز بقى بيحرك ملامح وشه بشكل محترف و بيوصل معاني من غير ما يتكلم ! و انا شخصيا بقالي فترة مشوفتش ( تلقائية ) عز الكوميدية بهذا الشكل الرائع .. محمد ممدوح ممتاز برضوا و قدم شخصية مكررة بعض الشئ و هي الضابط العاقل و الراسي بستايل لا يصلح لتقديمه الا ممدوح و زي ما قولت قدم دويتو كوميدي مع عز جبار يا جماعة .. سامر المصري جيد جدا و كان شرير لا بأس به على الاطلاق .. لكنهم كلهم كانوا ضحية الربع الاخير من الفيلم اللي ادائهم كلهم اتذبذب فيه .

الاخراج : بشكل عام جيد , دايما بقول ان احسن مخرج اكشن في مصر طارق العريان لان المخرج مهمته توصيل حالة المشهد و ده اللي مخرجين كتير بيهملوه في مشاهد الاشتباكات انهم مبيوصلوش الحالة و التوتر طارق العريان افضل من يوصل حالة و توتر مشاهد الاكشن في مصر .. لكن انا حسيت باسلوبه اكتر في مشاهد الدراما اكثر من مشاهد الاشتباك و الاكشن يعني في مشاهد انا شوفت طارق مخرج السلم و الثعبان اكتر من طارق مخرج تيتو و ولاد رزق و ده بصراحة اسعدني بشكل شخصي حسيت انه ركز بزيادة في توصيل حالة و توتر مشاهد الاشتباك و الحركة فاهمل المشهد نفسه !

زائد ان الفيلم فيه اخطاء تقنية ساذجة جدا ممكن يكون الموضوع بسيط بس انا محبش اشوفوا فيلم زي ده , مشهدين الصورة كانت فيها Noisey و دي انا مش فاهم ازاي مخدوش بالهم منها فريم الصورة تحس في انه في مشاهد Stretch !!! مشاكل في الجرافيكس في الربع الاخير برضوا ! مشاهد اشتباك فيها مشاكل في ال Sound Mixing مخجلة اللي هو صوت الضربة كان بيطلع قبل ما احمد عز يضرب اساسا !! و احيانا مكنش بيطلع !

معرفش لو كان في حد اتكلم عالموضوع ده ولا لا بس اتمنى يكون بروجيكتور السينما هو اللي كان فيه جليتش و لو اني اشك يعني و تكون المشاكل دي مش موجودة .

فيلم الخلية فيلم جيد و مسلي له ما له و عليه ما عليه و انا انبسطت بيه و بشكل عام مزهقتش منه او ندمت اني دخلته بس الفيلم فرصة مهدرة لان يكون افضل فيلم اكشن في تاريخ السينما المصرية .

• 6 helpful
• 1 not helpful