• Hossam Hassan
• 10:19 PM - 18 October 2022
• My Other Reviews

مراجعة فيلم smile من غير حرق

• فيلم smile ميختلفش في بنائه الدرامي عن أي فيلم أمريكي كلاسيكي رعب معروف وناجح .. الفيلم بيبدأ بشبح أو لعنة ما ماشية ومكملة لحد ما يبدأ الفيلم مع تعثر بطلنا بسكتها بمحض الصدفة .. وبعدها بيمشي في خطين متوازيين .. الأول هو فهم اللعنة وبالتالي إحنا كمان نفهم ومحاولة إكتشاف نقطة ضعف .. والتاني هو محاولة إنقاذ حياته المهنية والاجتماعية بسبب التغيرات اللي صابت شخصيته بسبب اللي بيخوضه واقناع المقربين ليه بمشكلته

• الخط التاني من الفيلم حقيقي كويس ومليان تغيرات جوة الفيلم وأحداث مشبعة وممتعة .. ويحسب للفيلم في نصه الأول استغلال الخط ده بالتوازي مع خطه الدرامي الأول

• في النص التاني من الفيلم تحديداً للاسف الوضع اتغير والخط الأول الخاص باللعبة غاب تماماً لفترة مش قليلة .. فجأة بطلتنا مبقيتش بتشوف اللي بتشوفه أو بتخوضه بدون مقدمات وانشغلنا بحياتها وتغيراتها فقط .. وإن كان ده ممتع ومليان بس مش مشبع .. لإن الفيلم فرض علي نفسه الخضات المتكررة وكان ابتدا يخوض في اصل المشكلة وفجاة وقف

• علي المستوي البصري كانت التجربة تستحق في كامل فصوله (علي قد المطلوب منه) .. jump scares وخضات كلاسيكية محبوبة ومفاجئة ومرعبة .. حركة الكاميرا كانت مؤثرة والمونتاچ كمان .. والمؤثرات الصوتية .. تمثيل كويس جداً مقارنةً بالمعهود من أبطال أفلام الرعب اللي مبيبقاش مطلوب منهم غير حاجات قليلة .. ولكن فيلمنا فيه مراحل لتغير الشخصية ومتعنونة وواضحة ومن الصعب تضحك علي الجمهور أو تتخطاها من غير مقدمات والفيلم ناجح في ده

• وفي فصل النهاية الأمور مش أحسن حاجة .. علي المستوي البصري أو النهاية للدراما نفسها اللي بالنسبة لي مخطوفة ومش علي مستوي الفيلم

فيلم smile هو فيلم أمريكي عائلي رعب كلاسيكي لطيف مناسب جداً لسهرة عائلية أو خروجة سينمائية خفيفة مش مطلوب منها تعلم معاك أو تصنع فيلم لا ينسي من كتب التاريخ .. بس صالحة جدآ للمتعة وإنها تخوفك وتقلقك أثناء المشاهدة وتخرج مبسوط .. واللي هيحضره هيتبسط

• 2 helpful
• 0 not helpful