• Hossam Waleed
• 03:28 مساءً - 6 فبراير 2019
• نقد آخر لنفس المستخدم

ملحوظة: كتب هذا التحليل في مُشاركات هاشتاج #أجملافتتاحيةفيتاريخالسينما على "فيسبوك".

افتتاحية أخاذة وعبقرية من تاني فيلم بس يعمله "بول توماس آندرسون" لما كان ساعتها ما زال شاب في العشرينات.

تمهيد أكتر من رائع للمشهد باختيار وضع موسيقى البوق على شاشة سودة لقرابة اﻷربعون ثانية، بعد كده "وان شوت" رائع جدًا، وتحكُّم عبقري في الميزانسين؛ الكاميرا بتجيب عنوان البار ومعاها عنوان الفيلم (ليالي البوجي) على خلفية موسيقى الروك المفاجئة.. حركة معووجة ربع دائرية من الكاميرا، قبل ما تهبُط عشان تركز على العربية اللي جاي فيها "جاك" و"آمبر" (شخصيتين مهمتين في دراما الفيلم)، وبتتابعهم حتى دخولهم البار.. بتسيبهم وتروح لشخصية أخرى بتتبّعها لحد ما تطلع على خشبة الديسكو وسط مجموعة راقصين. الكاميرا هنا بتقوم بحركة دائرية "كاملة" أثناء رقص وحديث الشخصيات مع بعض، قبل ما ترجع للشخصيتين اللي تابعتهم منذ البداية قاعدين على الطاولة المرّادي.

كل ده وات شوت بالـ Steadicam على طريقة "مارتِن سكورسيزي" في مشهد اللقطة الواحدة الشهير بـ(Goodfellas)؛ إيحاء ممتاز هنا بحركة ونشاط المشهد، المرتبط بـعنفوان الشباب اللي هوا أكتر حاجة المُشاهِد بيخرج بيها من الفيلم.

..القطع/الكَت اﻷول مبيجيش غير متأخر لما توصل الكاميرا لبطل الفيلم "ديرك ديجلَر/مارك والبيرج" في شغله في البار، والعلاقة اﻷولى بين الشخصيتين بتبدأ (وحبكة الفيلم الرئيسية تبدأ معها بالظهور: الفيلم ده رايح بينا على فين؟) لما بنلاحظ إن "جاك" هوا اللي بينظر لـ"ديرك" (تعبيرًا عن بحث جاك عن فتى بالقوة الفيزيائية اللي عند ديرك، واللي هنشوف تجلياتها حواريًا في مشهد لاحق/مشهد المطبخ).. بعد كده ديرك -ويمكن في نفس اللحظة- بينظر هوا كمان لجاك.. علاقة عينيّة متبادلة.. الناس في البار رايحة وجاية قدام الكاميرا وكأن "جاك" أخيرًا وجد كنزه اللي بيضور عليه كإبرة في قومة قش.

الفيلم يبدأ!

"أعتقد اللي لسه مشافش الفيلم وشاف المشهد ده، سهل يكوّن انطباع قوي عن الفيلم ده بيتكلم عن ايه من ناحية علاقات الشخصيات ببعضها".

السينما فن صورة.. والراجل ده مذاكر.

المشهد: https://youtu.be/fpV4dDBkSDQ

• 1 مفيد
• 0 غير مفيد