الممر .. تحيا مصر

ملحوظة : هذا النقد مكتوب باللغة العامية حتى تسهل قراءته

كنت خايف ادخل فيلم الممر من الاول عشان كنت فاكر انها هتبقى حصة تاريخ كلها عن الحرب ودراما طلعت غلطان .. خلينا ندخل فى تفاصيل الفيلم من غير مقدمات كتير الفيلم من بطولة احمد عز ومعاه مجموعة كبيرة. من تأليف وإخراج شريف عرفة اللى الف واخرج فيلم الجزيرة والكنز قصة الفيلم بتحكى عن حرب الاستنزاف اللى استمرت من سنة 1967 لسنة 1970 وبتتكلم عن روح الجنود المعنوية فى الفترة دى وحال الشعب من خلال قصة من احسن القصص اللى اتعملت فى تاريخ السينما المصرية. احمد عز وهند صبرى وشريف منير وأحمد صلاح حسنى وأمير صلاح وأحمد فلوكس ومحمد الشرنوبى وحجاج عبد العظيم كانوا تمام مافيش اى مشاكل. أما بالنسبة بقا لأحمد رزق وأسماء ابو اليزيد وإياد نصار ومحمد فراج ومحمود حافظ ومحمد جمعة فكانوا تمام جدا وتمثيلهم كان عبقرى. الاخراج بالتصوير وتصميم المعارك كانوا حلوين جدا ومافيهومش غلطة والمونتاج كمان كان تمام. السي جى اى كان حلو بس كان بيقلش منهم ساعات فى شكل الطلقات بس مش كتير يعنى بس مهم المهم انها اول محاولة جرافيكس ناجحة فى مصر بغض النظر عن الحاجات اللى سقطوها. الفيلم ده بيلعب على المشاعر وفعلا بيحسسنا اننا عايزين نحارب معاهم. الموسيقى لعمر خيرت ماكانش فيها حاجة جديدة او مميزة بصراحة. وكمان لو جينا نبص على الأهداف اللى الفيلم كان عايز يحققها هنلاقيه نجح جدا انه يحققها. نجح انه يخلينا نضحك ونسقف ونتأثر بموت اى ضابط مصرى ومش هنسى الشهقة اللى سمعتها فى السينما لما حد معين من عندنا مات من غير حرق. نجح انه يعرفنا حال الجنود فى الفترة دى وحال الشعب من خلال قصة مستوحاه من احداث حقيقية. نجح كمان انه يخلينى اخرج من الفيلم اقرر انى ادخل فنية عسكرية وده شىء يحسبلهم طبعا. وغير كل ده خلطة الفيلم اصلا كويسة وناجحة وعجبانى (كوميديا ودراما واكشن). فيلم الممر ممكن يتدرس على إنه فيلم وثائقى عن حرب الاستنزاف للطلبة وهتبقى فكرة حلوة لانه هيعرفهم تفاصيل الحرب بطريقة سهلة وممتعة. فيلم الممر 9 من 10

نقد آخر لفيلم الممر

عنوان النقد اسم المستخدم هل النقد مفيد؟ تاريخ النشر
الممر .. تحيا مصر Omar Sherif Omar Sherif 2/2 25 يونيو 2019
الممر .. دراما حربية وألغام سينمائية احمد رميح احمد رميح 0/0 4 اغسطس 2019