• الأمير أحمد رفعت
• 04:14 مساءً - 31 اغسطس 2022
• نقد آخر لنفس المستخدم

حامل اللقب هو فيلم كوميدي من بطولة هشام ماجد و محمد سلام و محمد ثروت و محمد فتحي..اللي هم كلمة السر اللي ورا نجاح أي فيلم كوميدي في آخر ٧ سنين...

الفيلم كفكرة كويس و يضحك...بس مش جديد... لأن سبق و الفنان هشام ماجد قدم فكرة الرجالة اللي بيعانوا من مشاكل أنثوية زي فيلم بنات العم...علشان كدة الفيلم ماحققش المردود المطلوب من صناع الفيلم....

و طبعاً خلونا نتكلم عن إن دة أول فيلم من بطولة هشام ماجد بس من غير شيكو....و دة تم بناءا على توقع الفنان هشام ماجد من ٣ سنين بما سألوه انفصلت انت و شيكو عن أحمد فهمي ليه.؟؟؟..و كان رده إن في يوم من الايام شيكو هينفصل برده...و قد كان..

طبعاً أنا مش محتاج أتكلم عن باقي الممثلين في الفيلم لانهم بصراحة عبارة عن وصفة تخلي أي فيلم جرعة كوميديا جبارة...و دة واضح من كل أفلامهم....الاخراج ممتاز و السيناريو متسلسل بشكل منطقي...و الموسيقى التصويرية كويسة جداً.....

طبعاً أنا لسة ماتكلمتش عن عنصر البطولة النسائية دينا الشربيني.... بصراحة اختيارها للادوار الكوميدية في الآونة الأخيرة هو اختيار غير موفق بالمرة...و أنا شخصيا مش فاهم هي ازاي وافقت تعمل الدور دة بعد دورها في فيلم ثانية واحدة اللي كان مش لايق عليها خالص و ماتقبلوش الجمهور...لاننا كمشاهدين بيبقى عندنا زي back ground كدة عن بعض الممثلين اللي مش بنحب نشوفهم غير في أدوار معينة...و من الممثلين دول الفنانة دينا الشربيني...فنصيحة من واحد من جمهورها... ياريت تركز على الأدوار العميقة اللي بتحتاج تحضير للشخصية...زي دورها في مسلسل قصر النيل و جراند اوتيل...لانها بتنجح جداً في الأدوار اللي زي كدة.....(ماعدا دورها العميق بزيادة في مسلسل المشوار مع نبر زيرو محمد رمضان.. لأن دورها في المسلسل دة كان كارثة بكل المقاييس)...

و في النهاية أحب أقول إن الفنان هشام ماجد من أنجح و أكبر كُتاب و ممثلين الكوميديا في مصر...لان عنده أفكار معينة تقدر ترسم الابتسامة على وشوشنا...لكن انا كواحد من جمهوره أحب اقوله إنك فنان عظيم لكن لازم تاخد بالك شوية من الوقوع في تكرار الأفكار.....

تقييمي هو 7 من 10

• 2 مفيد
• 0 غير مفيد