لعبة إبليس  (2015)  Leaabet Eblis

أراء حرة

 [1 نقد]

خلطة يوسف الشريف

• Mostafa Elsafty
• 12:00 صباحًا - 9 اغسطس 2015
• نقد آخر لنفس المستخدم

- المسلسل المظلوم من قوانين العرض الرمضاني :- اولا: المسلسل مش محتاج 30 حلقة خالص و لكن بما ان قوانين العرض الرمضاني لازم يبقى المسلسل 30 حلقة فتم حشو المسلسل بحاجات كتير عشان يكفي 30 حلقة لو كان اتعمل على 15 حلقة كان هيبقى ممتاز ثانيا : في مسلسل تشويق و اثارة بيعتمد على سرعة الايقاع لما يتم حشوه كده لازم يتحشي بحبكات مثيرة بس زيادتها بيعمل حالة من التوهان و الافورة ثالثا : من ضمن طرق الحشو الساذجة موضوع فقرة ( في الحلقات السابقة ) في اول كل حلقة و اللى مدتها ممكن توصل لخمس دقايق فتكتشف ان...اقرأ المزيد الحلقة بتتر البداية و تتر النهاية و الحلقات السابقة مدتها 35 دقيقة بالكتير يعنى صافي وقت دراما الحلقة بالكتير 25 دقيقة - المسلسل المظلوم بسبب اولا : اول مراحل تشبع يوسف الشريف بروح النجومية و طمع النجوم اللى خلاه يقوم بدور اتنين اخوات مش توأم و مفيش اي سبب درامي انهم يكونوا اخوات متتابطقين في الشكل لمجرد ان بطولة المسلسل و تحريك الاحداث معتمد عليهم هم الاتنين بشكل يكاد يكون متساوي و لو كان جاب ممثل تاني يقوم الدور (عمرو يوسف مثلا كان هيعمل دور سليم حلو جدا) بس ساعتها كان هيبقى بطولة مشتركة و ده مرفوض عشان الاتنين بقوا نجوم ثانيا : انشغال الكاتب عمرو سمير عاطف بكذا عمل و استعانة بمساعدين في كتابة السيناريو فخرج المسلسل نص سوا قبل ما يستوي براحته في دماغ مبدعيه . ملاحظات جانبية :- - اداء متميز لمحمد رياض و عودة قوية اعتقد انها هتبقى اعادة انطلاق ليه في التمثيل - اداء اوفر و مفتعل لانجي ابو زيد (رشا في المسلسل) و انتقالها بين الخير و الشر فيه سذاجة و افتعال - تصميم تترات المقدمة و النهاية ممتاز - مكياج اميرة العايدي يجعلها كما يقول د.احمد خالد توفيق (شاحبة كالموتي) - اداء هبة مجدي مفتعل - السيناريو محشو بتويستات مالهاش لازمة في محاولة بائسة للحفاظ على ايقاع المسلسل - فكرة حشو الاحداث بمشاهد العروض السحرية فكرة صايعة - تويست النهاية جميل و غير متوقع و قفل المسلسل قفلة حلوة قبل بداية رمضان و مع عرض تترات المسلسلات صديقى اعتقد لوهلة ان يوسف الشريف هيقدم تيمة الشخص اللي بيبع روحه للشيطان مقابل قدرات و حاجات الشيطان بيدهاله و اللى اتقدمت كتير في رويات و افلام اجنبية و انا كان نفسي يعمل كده فعلا بس للأسف محصلش . عموما يوسف الشريف بيعتمد على خلطة كده هو عملها لنفسه مع الزمن ..يعني السبكي عمل خلطة البلطجي و الرقاصة و السجن و الفرح الشعبي و يوسف الشريف عمل خلطة الجرايم و التويستات الكتير و معظم الشخصيات شريرة و بتلعب على بعض و عدد الشخصيات كتير و احداث كتير متشابكة بتنتهي ب plot twist بيغير كل حاجة و كرر الخلطة دي تقريبا في كل المسلسلات اللى عملها مع اختلافات بسيطة و اعتقد ان يوسف الشريف محتاج يغير جلده و يجرب انواع جديدة من الدراما و يخترق مناطق جديدة مصطفي الصفتي

• 7 مفيد
• 0 غير مفيد

أضف نقد جديد