H دبووور  (2008)  H. Dabbour

أراء حرة

 [5 نقد]

"اتش" ضحك جديد و مختلف عن الجميع شكلا و موضوعا و اسلوبا!..و مهواش لمبى بالمرة!..بلاش نستسهل و "نقولب" كل الناس!

• Fady Baha'i Seleem
• 12:00 صباحًا - 18 يناير 2010
• نقد آخر لنفس المستخدم

اجمل ما فى فيلم "H دبور" هو ابتعاده عن شخصية اللمبى.. هل فجأتك؟ لا تفاجأ.. كلاهما..شخصية سلبية اينعم..كلاهما يتعاطى المخدرات..فعلا.. و لكن ليس كل من هو سلبى و يتعاطى المخدرات متطابق.. اتش"..ثرى..مدلل..متعالى..كسول..خامل..ظريف..متناسق الجسد....متعلم تعليما"مُكلفا" (يعنى مش تعليم مجانى!) و فوق ذلك راقص غربى ماهر..و هو شاب "مُتآمرك".. اللمبى..شاب مسطول..ذو كرش صغير..عاطل..فقير....ظريف..شعبى..ابله..مغيب..بلطجى..غير متعلم تقريبا..و فوق ذلك راقص شرقى متميز..شاب "بيئة" من الآخر.. كلاهما كاراكتر...اقرأ المزيد كاريكاتيرى صارخ..(نسبُه مضخمة.) الفكرة.. فكرة جرئية..هى انتزاع احد شخصيات مسلسل كوميدى قصير (منفصل – متصل) (اى سيتيوايشن كوميدى (سيت كوم) / مينى سيرييز)..و تخليق منها بطلا لفيلما سينمائيا منفصلا.. سبق ان انتزعت اللمبى من فيلم (الناظر) و اكتسح بها محمد سعد الجميع.. و انتزعت امه "فرنسا" من فيلم "اللمبى" و صنع منها فيلما كاملا..هو (خالتى فرنسا). كما انتزع "هيثم دبور" من رباعية (تامر و شوقية التى بدورها منقولة بتصرف من مسلسل دارما اند جريج الامريكى الشهير!) سلسلة من الانتزاعات غريبة..قيل..ان محمد سعد يفكر فى انتزاع شخصية "رياض المنفلوطى" لصنع منها فيلما كاملا هى الاخرى.. صباح الـChain Reaction يعنى! كانت فكرة الفيلم للمخرج الشاب المثقف "احمد مكى" و هو بطل الفيلم..و شخصية مثقفة فعلا..لا تصدق ان مثلها ممكن ان تتقن هذا الدور البعيد عنها كل البعد..و هذا يدعو للتصفيق فعلا.. اخرج احمد مكى فيلما كوميديا فشل فشلا ذريعا..و يعد بحق واحد من اسوء عشر افلام كوميدية فى الخمس عشرة سنوات الماضية!! (الحاسة السابعة) كما انه ظهر بشخصية شبه متطابقة لشخصية "اتش" فى فيلم (ابن عز) منذ 9 سنوات تقريبا..شخصية "كيمو" ذو الشعر الطويل الشديد النعومة..صديق فريد عز الدين النذل! (بطولة ثالثة فى اكبر إخفاقات علاء ولى الدين السينمائية..رحمه الله). القصة.. مش بطالة..آه..هو ده اللى تقوله..ممكن تقول انه فيه قصة (مجاملةً بجد!)..بس اهى قصة و السلام..اينعم لا فيه لا ابعاد و لا اعماق و لا ابحار و لا اسقاطات او رموز و لا اى بتاع ..خاااالص..مافيش اى معانى فلسفية و فنية و حياتية (على الرغم من ان فيلما كفيلم "كباريه" احتوى على الكثير منها..و هو ما شكل مفاجأة سينمائية من العيار الثقيل هذا الموسم..فيلم كباريه هو مفاجأة 2008 السينمائية يا جماعة بجد!)..بس احتوى على "معنى"..مهم و جميل..و هو مفهوم "الجدعنة" و "الاصالة" و "الطيبة" و "الشهامة" و "الفروسية" و "المرجلة!!"..بس بطريقة متلكلكة و مسلوقة شوية..هى مسلوقة "سلقا جيدا" (للامانة!) بس برضه مسلوقة!..مش عارف نمشيها قصة..و لا نمشيها قصة الا حبة..يعنى..مش بطّالة زى ما قلت! هالة فاخر.. بعد دورها التاريخى..الجميل و المهم و الرائع..فى فيلم "هى فوضى"..الذى اعاد فيه يوسف شاهين اكتشافها بعد 37سنة تمثيل (كارثة!)..تعود متقمصة شخصية "طمطم" بس على شكل انسانة عجوزة ممتصابية (بس برضه جميلة..ازاى؟..ماحدش يعرف!!..برافو على الماكيير جدا بجد!!!) تمتلك دارا لصناعة و توزيع مستحضرات العناية بالبشرة و الشعر..بس طمطم برضه..مثل 85 % من ادوارها يعنى.. اخص! حسن حسنى.. سمك..لبن..تمر هندى..محشى كرنب..عسلية..حمص الشام..اى حاجة..انا بتاع كله..انا الممثل ذو الستة افلام سنويا.. حسن حسنى.. هو اخطبوط السينما المصرية..بيمثل اى حاجة و كل حاجة..مرة يتفوق على حسين رياض..و مرة تلاقيه ممثل هندى..فعلا..الفلوس حلوة!!!!!! (رجل عجيب فعلا..سبحان الله) احمد مكى.. مش بطال.. المخرج احمد الجندى..لا لون و لا طعم و لا ريحة..زى المية..تتشرب و خلاص..عطشانين و عايزين نضحك..و اهو احسن من "الزفت" مؤنس الشوربجى (مخرج لحظات انوثة!) انجى وجدان.."داليا" فى (تامر و شوقية)..و "ارواح" فى (دبووور)..المونتيرة التى اصبحت ممثلة و موديل إعلانى صامت..برافو..فاتحة خير سينمائية حلوة..الاشادة مطلوبة. الموسيقى.. اى كلام..اى هبل بصراحة..(ما عدا الاعنية الراب "جدعان طيبين"..مش وحشة..(برضه!!.)) الديكور..ساعات كويس و ساعات بيبقى واضح مووت انه ديكور..و ديكور مسرحى..و ديكور مسرحى مدرسى كمان!!! الملابس..مش حاسس ان كان فيه حد بيشتغل فى موضوع الملابس (الا يمكن مع هالة فاخر بس يظهر!)..يمكن كان مساعد المخرج او الكلاكيست بيقوم بالمهمة (الشاقة) دى! السيناريو..نص نص..و واضحة موووت إضافات احمد مكى الصغيرة و اليومية اللى واضح و الظاهر انه كان بيعملها فى اثناء التصوير! التتر..غريب و عجيب و جديد..بس مش قد كدة.. الفيلم يطرح معادل جديد لمحمد سعد..تمهيدا لإزاحته عن عرش الايرادات مرة واحدة و نهائية و يطمح فى تصفيته سينمائيا (بإشتراك محمد سعد نفسه..الحرق الذاتى..زى عربية "باتمان" كدة ( :D ..و سرعان ما سيهبط محمد سعد إلى الحضيض..محمد هنيدى واضح انه منهار سينمائيا اصلا..اما احمد ادم و اشرف عبد الباقى فراحت عليه..هانى رمزى بيكافح..بس كفاح سخيف!! احمد مكى لديه موهبة جميلة و خفة دم حقيقية و حضور طاغى افضل من 90% من ممثلين مصرالحاليين..و لو اجتهد..فانه يستطيع منافسة احمد السقا و احمد عز و كريم عبد العزيز و هانى سلامة فى منطقتهم!!! :) النتيجة الاجمالية 5.75 من 10

• 1 مفيد
• 1 غير مفيد

أضف نقد جديد

عنوان النقد	اسم المستخدم	هل النقد مفيد؟	تاريخ النشر
اتــــش دبـور...لمبــى جديد بشعر كنيـش	Morad Mostafa	2/8	5 مارس 2009
Beautifullllll....	Samer Abdel Hamid	3/5	11 اغسطس 2008
فيلم سىء	Usama Elsayd Abdelazim	0/4	1 اغسطس 2009
Beautifullllll....	Samer Abdel Hamid	1/4	11 اغسطس 2008