أراء حرة: فيلم - The Hobbit: An Unexpected Journey - 2012
الهوبيت: فيلم غير متوقع
![دعاء أبو الضياء]()
دعاء أبو الضياء- 12:00 صباحًا - 26 ديسمبر 2012
- نقد آخر لنفس المستخدم
دعاء أبو الضياءفي الوقت اللي قررت فيه مشاهدة فيلم (الهوبيت: رحلة غير متوقعة) بعد طول انتظار زي ما كتير اوي انتظروه؛ وبعد ما شاهدت أجزاء فيلم (سيد الخواتم) على مضض واللي ماكنتش شوفتها قبل كدا كاملة؛ خوفا مني إني مقدرش اربط بين أحداث الفيلم الجديد والأجزاء السابقة، باﻹضافة إلى قرأتي لبعض معلومات عن رواية تولكين اللي قدمها عام 1937 وعرفت من خلالها معلومات عن الهوبيت، وبناء على النجاح اللي حققته الرواية واللي تحولت إلى عمل سينمائي لاقى هو الأخر نجاح وتأييد كبير فني وجماهيري، شاهدت الفيلم اللي كانت المغامرة فيه...اقرأ المزيد المرة دي عبارة عن رحلة أخرى من رحالات الهوبيت لاسترجاع مملكة استولت عليها قوى الشر، ومع أول عشر دقائق واستكمالا ال45 دقيقة الأولى من الفيلم أصبت بصدمة قوية أوي،،،، صدمة زادت معها علامات الاستفهام عن سبب الضجة الكبيرة وتصدر الفيلم للبوكس أوفس لفترة طويلة؟؟؟؟ كل شيء جوا الفيلم لا يقول شيء، وحسيت أن في مرض أصاب بيتر جاكسون عشان يقرر تقديم ثلاث أجزاء اخرى من هذه القصة، حوار بارد جدا لمدة ساعة على الأقل يحكي فيه (جاندالف) عن حكايات وقصص مملة للغاية وكان من الممكن حذفها نهائيا دون الإخلال بأحداث الفيلم، باﻹضافة إلى مجموعة من المشاهد غاية في الاستفزاز بدأت بتعرف هوبيت على الأقزام بمنزله وانتهت بنهاية الفيلم، ولو قارنت بين الأجزاء السابقة من (سيد الخواتم) والفيلم الجديد اعتقد أن وجه المقارنة هيبقى صعب أوي إني أحدده خاصة إن أجزاء سيد الخواتم أقدر أقول عليها أنها فعلا أبهرتني نوعا ما، والجزء الجديد لا أجد ما يصفه غير أني حسيت معاه وكإني بشاهد فيديو جيم، وأني مش محتاجة إلى تركيز عالي في عالم السحر والفانتازيا علشان أفهم هو بيقول إيه، اعتقد إن الحسنة الوحيدة واللي هتتحسب وتخلي أي حد يشوفها هي خاصية (اﻵيماكس IMAX) فقط واللي ح تقدر معها ومن خلالها تستمتع وتنبهر بالفيلم والتقنية العالية والمؤثرات البصرية اللي قدمها جاكسون؛ لكن لو بتفكر تشاهده بتقنية عادية زي ثلاثي الأبعاد انصحك تعيد التفكير جديا في ده
The Hobbit - تقنية سينمائية جديدة
![Ahmed Alaa]()
Ahmed Alaa- 12:00 صباحًا - 28 ديسمبر 2012
- نقد آخر لنفس المستخدم
Ahmed Alaaفى آخر مشاهد The Lord Of The Rings: The Return Of The King يجلس فرودو باجنز في شاير؛ ارض الهوبيتس، بعد رحلة استمرت ١٣ شهر فى Middle Earth يكتب رحلته الاسطورية في كتاب قبل ان يدخل عليه ساموايز جامچي ويقاطعه: خلصت كتابك يا فرودو!!؟؟ فرودو فعلاً كان خلّٓص روايته ، في الوقت ان كاميرا بيتر چاكسون جابت رواية تانية اسمها The Hobbit’s Tale واللي كاتبها بيلبو باجنز .. من ساعتها تأكدت ان بيتر چاكسون ناوي على جزء رابع على اقصى تقدير.. بس للاسف خذلني وطلع كان ناوي على ثلاثية تانية غير The Lord Of The...اقرأ المزيد Rings منذ ثلاث سنوات تقريباً اعلنت شركة New Line Cinema والمخرج بيتر چاكسون عن انتاج الثلاثية الجديدة من رواية تولكين اللي قدمها سنة 1937 بإسم The Hobbit بصراحة محاولتش افكر كتير في شكل الفيلم.. من الاخر احنا بنتفرج على حاجة من اخراج بيتر چاكسون اللي واخد اوسكار 3 مرات عن افلام من نفس النوعية. فيلم ممتع.. دي اول كلمة قلتها بعد ما استمعت بحوالي ٣ ساعات هي مدة عرض الفيلم، سينما جديدة، تصوير جديد، اخراج عبقري من بيتر چاكسون كالعادة، تمثيل جميل من ايان ماكلين ومارتن فريمان .. بس للاسف لما الابهار راح ملقتش حاجة اقدر افتكر بيها الفيلم ، زي ما انا دلوقتي مش عارف اكتب حاجة عنه. ولكن .. طبيعي جداً ان الفيلم ميبقاش مفهموم بدرجة كبيرة، احنا شفنا ثلث الفيلم فقط لاغير!! لسة قدامنا حوالي 4 ساعات من الرواية على جزئين The Desolation Of Smaug - 2013 و There Back and Again - 2014 عشان نحكم على الفيم كامل. الموضوع هيفضل مفتوح ل ديمسبر 2014 .. مع نهاية الثلاثية عشان الحكم يكون منصف . شوية ملاحظات:- الفيلم مينفعش يتشاف غير ف ايماكس ثري دي .. اللي مدخلوش يلحق يدخله، السينما مدت عرض الفيلم اسبوع كمان. اول ٥ دقايق من الفيلم قلت بيتر چاكسون بيفرد عضلاته وبيقول انا في اكاديمي اووردز 2013 موسيقى الفيلم من اكبر عوامل نجاحه، في الوقت ان صوت الفيلم نفسه من اكبر نقط الضعف اللي واضحة فيه. مشهد بيلبو وهو بيلاقى الخاتم وساوند تراك The Lord Of The Rings بيشتغل في الخلفيه تخلي جسم الواحد يقشعر ويفتكر الفيلم الاصلي. هتلاقي في الفيلم روابط كتير بينه وبين الثلاثية الاصلية، محدش هيفهمها الا اللي حافظ The Lord Of The Rings ذا هوبيت هيترشح ل٣ جوائز اوسكار على الاقل، وهياخد اتنين منهم على الاقل برضو لحد اللحظة.. دي ذا هوبيت متصدر البوكس اوفيس في تاني اسبوع عرض بمجموع ايرادات 150 مليون دولار في امريكا فقط وحوالي مليون جنيه في سينمات مصر
الهوبيت : أثارة غير متوقعة
![Mido Rammstein]()
Mido Rammstein- 12:00 صباحًا - 5 يناير 2013
- نقد آخر لنفس المستخدم
Mido Rammsteinملحوظة قبل ما تكمل قراءة : النقد ده هايحرقلك الفيلم لو مشوفتهوش . بصفتى من ملايين ال Geeks حوالين العالم اللى كانوا مستنيين فيلم The Hobbit: An Unexpected Journey لعشقى الشديد لثلاثية Lord of the rings و فضلت مستنيه انا وصحابى من سنة 2005 من اول ما طلع كلام كدة ان بيتر جاكسون عايز يصور الرواية المشهورة و يحولها لفيلم زى ما عمل مع LOTR , فلكم ان تتخيلوا فيلم مستنيه بقالى اكتر من تمن سنين هابقى عامل ازاى ادامه , حبنا و انتظارنا للفيلم وصل لدرجة اننا كنا قاعدين ادام السينما قبل عرض الفيلم لمدة...اقرأ المزيد سبع ساعات مستنيين اول عرض . الأول هاتكلم عن تقنية التصوير اللى بيتر جاكسون اصر انه يستخدمها , بيتر كان مصر ان الفيلم يبقى اول فيلم فى التاريخ يتصور ب 48 fbs بدل من التقنية المتبعة 24 fbs , التكنولوجيا المتبعة مفيش كلام مبهرة , بس الى حد ما بتخلي تجربتك للفيلم مش كاملة , فى LOTR كنت قاعد فى السينما و حاسس انى جوا ال middle earth و انى مع فرودو و جاندالف و كل صحبة الخاتم فى مغامراتهم , كنت حاسس انى جوا الفيلم مع ابطاله , بس فى The hobbit حسيت انى قاعد فى السينما و بتفرج عليهم , محستش زى قبل كدة انى معاهم فى وسط المغامرة , فى الاول و فى الاخر احنا اتعودنا على تقنية ال 24 fbs اللى كل الافلام قبل كدة متصورة بيها , لكن التقنية الجديدة الى حد ما مرهقة للعين ( مجربتهاش فى سينما IMAX للأسف بس اللى شافها قال نفس الكلام ) , بس ده ممكن يكون راجع لزى ما قولت كدة ان احنا اتعودنا على التقنية القديمة و دى اول مرة نتفرج على فيلم بال Format ده , و بينى وبينكوا كانت مغامرة فعلا من بيتر جاكسون انه يصور الفيلم بالتقنية دى , ده فيلم هايكون تاريخى يا عم بيتر ليه تعمل كدة فينا , خلى التقنية تتجرب الاول فى اى فيلم تانى و بعدين جربها انت ماتكونش اول واحد يجربها فينا . عموما رجعت شوفت الفيلم تانى بتقنية 24 fbs و استمتعت بيه جدا , ف نصيحة منى ياريت اول مرة تشوفوه تتفرجوا عليه بالتقنية القديمة مش الجديدة . ثانيا بقى الفيلم نفسه , اقول ايه ولا ايه ولا ايه , الفيلم فى اوله فى عشر دقايق كدة بيتكلم عن مملكة ما تحت الجبال بتاعت الاقزام و التنين سموج و كدة , واظن انها موضوعة باحترافية عالية جدا من بيتر جاكسون علشان الناس اللى مقروش الرواية يعرفوا يدخلوا فى جو الفيلم بالظبط و يقدروا يفهموا الدنيا ماشية ازاى . الفيلم بيبتدى يمشى مع احداث الرواية من اول وصف الهوبيت بيلبو باجينز لبيته و مقابلته لجاندالف وعرضه عليه انه يقوم بمغامرة و مقابلته للاقزام , الفيلم تصويره اكتر من رائع , موسيقى تصويرية اظن انها هاتاخد جايزة اوسكار لاحسن موسيقى السنة دى , فيه مشاهد بتخلى جسمك يقشعر بمعنى الكلمة ( زى مشهد اغنية الاقزام الحزينة عن مدينة ما تحت الجبال و الكنز الضائع اللى هو هدف مغامرتهم ) و ( مشهد الالغاز اللى بيلبوا لعبها مع المخلوق ( جولوم-سميجول ) من المشاهد الجميلة جدا اللى بيتر عملها بأحترافية عالية جدا ) . اهتمام بيتر جاكسون بالتفاصيل مرعب فعلا فى الفيلم , فى تفاصيل كدة صغيرة بس بتفرق كتير معايا او مع غيرى كعاشقين للسلسلة , مثلا في مشهد لما العمالقة التلاتة اتحولوا لتماثيل , التماثيل دى انت شوفتها قبل كدة فى اول جزء من ثلاثية LOTR (النسخة ال extended ) وضعية التماثيل هى هى بالظبط اللى شوفتها قبل كدة , اهتمام الراجل ده بالتفاصيل هو اللى خلاه بيتر جاكسون فعلا زى ما احنا عارفينه دلوقتى . فى شوية احداث فى الفيلم دخيلة على الرواية , زى ظهور الساحر ( Radagast the Brown) و ظهور ( saruman the white ) و طبعا كان لسة ساعتها ساحر طيب مش زى ما شوفناه فى LOTR . لكن فى شوية مآخذ على احداث الفيلم اللى بيتر ضافها و مش موجودة فى الرواية , يعنى مثلا فى مشهد كان فى قطيع من الاوركس بيطارد التلاتاشر قزم قريب من مملكة الجنيين و طلع جنود من المملكة علشان يقتلوا قطيع الاوركس , و كان قائد الجنود هو الملك نفسه ( إلروند ) ازاى الملك يطلع قائد لحملة جنود استكشافية كدة ؟ حاجة تانية و دى كل الناس لاحظتها تقريبا , جاندالف فى the hobbit اقوى بكتييييير اوى من ثلاثية LOTR , كان بمثابة الملاك الحارس للمجموعة , اى مشكلة تحصل كان بيطلعهم منها , ايه اللى حصل بين الجزئين خلى جاندالف ضعيف بالطريقة دى فى LOTR ؟ دى حاجة مش فى الرواية و مش فى الفيلم كمان . و كمان حاجة ظهرت فى الفيلم ومش موجودة فى الرواية ظهور ال (نيكرومانسر ) او ملتهم الموتى , هو موجود فى الرواية , بس مش زى الفيلم كدة مش واخد مساحة كبيرة يعنى , بس دى حاجة فرحتنى شخصيا وفرحت ناس كتير لان النيكرومانسر ده هو ( ساورون ) ذات نفسه , الملك الشرير صاحب الخاتم , ف الربط بين الفيلمين عجبنى بصراحة . اخر ساعتين من الفيلم بتخليك مشدود لكرسيك حرفيا من كتر المطاردات و الاكشن اللى فيها , لو بتحب الاكشن اوى مش هاتندم بس صدقنى الجزء الجاى هايولع الدنيا بالنسبة للاكشن ( هاتفهم قصدى لو قريت الرواية ) . بالنسبة للأجزاء اللى جاية بقى , مش فاهم ليه بيتر جاكسون قرر انه يخلى الفيلم تلات اجزاء , قصدى ان الرواية صغيرة و جزء واحد مش تلات اجزاء زى LOTR , كمان احداث الجزء ده انتهت عند حتة هاتخلى الناس اللى قروا الرواية يقدروا يعرفوا بسهولة ان الجزء الجاى ممكن يخلص فيه الرواية كلها هايكون فيها مواجهة التنين و معركة الجيوش الخمسة , طب والجزء التالت طيب يا عم بيتر هاتحط فيه ايه ؟؟ بيتر جاكسون مصر على مفاجأتنا , انا عن نفسى مش عارف هايعمل ايه بالظبط فى الجزئين اللى جايين و هايبقى شكلهم عامل ازاى , بس ماظنش ان املى هايخيب يعنى . تقييمى للفيلم عموما عالى جدا بيتر جاكسون مخيبش امل محبى ال middle earth ورجعهم لجوها تانى بفيلم اظن انه هايحصد جوايز اوسكار كتير للعام ده . من الاخر , اتفرجوا على الفيلم , و تمتعوا بأثارة غير متوقعة !!!
