Man of Steel  (2013)  رجل من حديد‎

أراء حرة

 [4 نقد]

سوبرمان : بداية جديدة .. و مبشرة

• Mido Rammstein
• 12:00 صباحًا - 22 يونيو 2013
• نقد آخر لنفس المستخدم

بداية .. أظن ان مفيش فيلم فى التاريخ كان عليه كل الضغط ده من المعجبين على فريق العمل علشان يطلعوا فيلم حلو زى الفيلم ده ، و السبب ؟ السبب ان 34 سنة عدوا و العديد من الافلام اللى تناولت قصة سوبر مان اتعملت و مفيش ولا واحد منها كان على المستوى المطلوب .. اطلاقا ، بالبلدى كدة ، كلهم كانوا زفت اذا سمحتولى باستخدام اللفظ ده .. عشاق سوبر مان كانوا جابوا اخرهم ، و دى كانت اخر فرصة لهوليوود علشان يطلعوا بفيلم كويس عن سوبر مان ، اللى هو الفانز كانوا خلاص بيقولولهم ( it's now or never ) ، و نجحوا اخيراً...اقرأ المزيد ! انا كنت داخل الفيلم من البداية متحفز ، لأن الفيلم باين من عنوانه انه reboot لقصة سوبر مان و هايبقى في اختلافات ( اللى قروا سلسلة الكوميكس عارفين ان فى اختلافات بين man of steel و superman ) .. و فى نفس الوقت كنت متحمس لاخراج زاك سنايدر للفيلم ، خصوصا ان المنتج هو كريستوفر نولان ( مخرج ثلاثية dark knight الملحمية ) ف كنت عايز اشوف هايخرجوا بأيه . تسمحولى اخدكوا بعيد عن الموضوع سِنة بسيطة ؟ تمام ، سر النجاح الرهيب ل ثلاثية dark knight كان معالجة كريستوفر نولان ليها .. كريستوفر نولان ركز على الجانب الإنسانى من شخصية باتمان ، مبقاش مجرد قناع لبطل خارق ، لا ورانا ايه اللى ورا القناع ، ورانا شخصية بروس واين اكتر من شخصية باتمان ، و ده اللى نجح الفيلم فى رأييى و رأى ناس كتير جدا ، لان البطل الخارق هو انسان فى الاول و الاخر ، عنده مشاكل و عيلة و حياة خاصة بيه ، و كريستوفر نولان ركز على الموضوع ده . و ده اللى حصل فى man of steel مع زاك سنايدر ، و هانتكلم على الموضوع ده . الفيلم بيتناول القصة الرئيسية لسوبرمان ، هاتشوف كوكب كريبتونايت فى الأول بتفاصيله الغنية و التكنولوجيا و الحضارة اللى فيه ، مش هاتشوفه مجرد صخرة هاتنفجر فى اول الفيلم و خلاص ، لا هايدخلك جوة الحياة بتاعت كريبتونايت اكتر ما كنت مستنى و ده شىء كويس جدا ، علشان كدة اول ما سفينة الطفل ( كال إل - سوبرمان ) توصل الارض ، علطول هايدخلك على مرحلة شبابه ، و هاتشوف مرحلة المراهقة و الطفولة بعد كدة فى حتت فلاش باك . بالنسبة لطاقم العمل ، شخصية سوبرمان بيلعبها الممثل ( هنرى كافِل ) .. اللى شوفته اول مرة فى فيلم ( immortals ) و كان تمثيله حلو جدا لدرجة خلتنى استمتع بالفيلم اللى مكانش حلو .. و فى الفيلم هنا ادى دور سوبرمان ببراعة منقطعة النظير ، شكله و تكوينه الجسمانى كان مناسب جدا و اللى اظن انه قعد فترة كبيرة على ما وصل للتكوين ده لانه كان حجمه اصغر من كدة فى immortals .. و ده يوريك مدى تفانيه و اخلاصه لشغله ، تمثيله فوق المقنع كبشرى بيكتشف فجأة انه كائن فضائى ، غير تفصيلة مهمة كمان ، ممكن تبان صغيرة بس هى مهمة جدا ، تعبيرات وشه لما اكتشف انه بيطير لاول مرة ، مش زى الافلام اللى قبل كدة ( ايوة انا بطير لان انا سوبر مان انا مش مندهش ) .. لا ، هنا ده اتربى و كبر فى الأرض ، تخيل انت لو اكتشفت انك بتطير فجأة هاتبقى عامل ازاى ، حقيقة انه بيتصرف كبشرى عجبتنى جدا . بغض النظر عن هنرى ، باقى طقم التصوير فعلا كان تمثيلهم رائع أيمى آدامز كانت كويسة جدا فى دور لويس ( انا شخصيا بحبها و بحب تمثيلها جدا ) كيفن كوستنر كان رائع فى دور جوناثان كِنت برغم صغر الدور راسل كرو كان اكتر من رائع فى دور جور إل برغم صغر الدور برضو و المفاجأة بالنسبالى ، مايكل شانون فى دور الجنرال زود ، شرير الفيلم ، مايكل شانون ممثل كويس جدا ، لكن مكنتش شايف انه ينفع فى الدور ده ، كان فى بالى ممثلين كتير ينفعوا فى دور زود ، لكنه كان قنبلة الفيلم فعلا ، لعب دور الشرير بجدارة ، و قدر يوصل للناس فعلا انه مش شرير لمجرد الشر ، هو بيعمل كدة علشان مصلحة شعبه ( شعب كريبتونايت ) لدرجة خلت ناس كتير تتعاطف معاه فى الاخر ( و انا منهم ) . المخرج زاك سنايدر ، برغم كونه مخرج مستقل ، كنت ممكن تشوف بصمة كريستوفر نولان فى حتت معينة من الفيلم ، لكن فى العموم زاك سنايدر عنده رؤية و بصمة واضحة خاصة بيه فى الاخراج ، و هو مخرج كويس جدا محدش يقدر ينكر طبعا . لو فى مأخذ على الفيلم بس ، ف هو مشهد القتال بين سوبرمان و زود ، مبالغ فيه ، مش معنى كدة انى محبتهوش ، بس حسيته كتير لو فاهم قصدى ، ماشى عمالين تضربوا فى بعض و تكسروا فى مبانى ، طيب كفاية ، زى مثلا ما بتتفرج على عرض ل الالعاب النارية بتاعت راس السنة لمدة نص ساعة ، و بعد دقيقة تقول ، ماشى ، انا مش هاشوف حاجة جديدة ، هو حلو اه بس ممل .. اهو ده نفس الكلام . عموما صناع الفيلم قدروا فعلا يطلعوا بفيلم محترم اخيرا ل سوبر مان ، عملوا بداية كويسة لسلسة جديدة ، و خلانى اتشوف لمعرفة اللى هايحصل فى العالم ده و مستنى الاجزاء اللى جاية منه ، فيلم اكتر من جيد ، و يستحق المشاهدة فعلا .

• 7 مفيد
• 2 غير مفيد

أضف نقد جديد

عنوان النقد	اسم المستخدم	هل النقد مفيد؟	تاريخ النشر
سوبرمان من جديد	أحمد مجدي رجب	5/7	20 يونيو 2013
غزو الكومكيس.1	Ahmed Fox	0/14	24 يونيو 2013
افضل افلام سوبر مان ولكن	Ahmed Hesham	1/1	16 اكتوبر 2013