Gifted  (2017)  موهوب

أراء حرة

 [1 نقد]

تجربة مبهجة وعاطفية وحميمية.. وحاجات تانية!

• Hossam Waleed
• 09:59 صباحًا - 7 يناير 2018
• نقد آخر لنفس المستخدم

من إخراج (مارك ويب)، اللي وقف ورا إخراج (500 Days of Summer) فيما قبل حاسس اني شفت الفيلم فـ موود مناسب جداً، وقت الظهيرة .. يمكن عشان الوقت ده من اليوم هوا الوقت اللي شفت فيه أفلام كتيرة حلوة قبل كده بأسمّيها (أفلام الأيام الخوالي) .. يمكن .. الفيلم هذا فيه نسبة مش قليلة خالص من المشاعر والأجواء الحميمية اللي يخلوني أسترجع فترة زي دي، حاجة جميلة ان فيلم يقدر يعمل فيا كده.. (القصة .. الحكاية .. الحدوتة .. ) القصة المرادي بتحكي عن بنت عبقرية في الرياضيات، أمها ليها تاريخ طويل غامض من...اقرأ المزيد الأحداث اللي على مدار الفيلم كله عمالة تتكشف لينا لغاية المراحل الختامية، والصراع أو المشكلة فـ الفيلم تكمن فـ إن البنت دي (عندها سبع سنوات وإسمها "ماري آدلر") طرفين من أهاليها بيتخانقوا على مين الأحق انه يتكفل بيها ويخليها تعيش معاه: خالها اللي بيشتغل عمل حر (فريلانسـر) فـ تصليح المراكب ؟ (اللي عامل دوره كريس إيفانس) ولا جدتها البرجوازية المهووسة بإن حفيدتها عندها إمكانية انها تحل معادلة رياضية لخدمة العلم ؟ .. المعادلة دي بنعرف أول الفيلم ان أم الفتاة معرفتش تحلها أبداً فـ حياتها اللي قضت معظمها في محاولة تحقيق الهدف الواحد ده.. كمان بنعرف ان الأم سبب موتها وتركها للبنت العبقرية انها انتحرت.. السؤال اللي بيرطحه الفيلم هوا : مين فـ الطرفين اللي فـ النهاية هيحصل على كفالة البنت ؟ وايه شعور البنت أصلأً -النبيهة والذكية جداً- من كل الدراما الأسرية اللي حواليها دي ؟ (الثيم.. الصنف.. النوع.. الكاتيجوري ..) هوا ماشي فـ صنف الـ(جوود فيلينـج موفيز) من النظرة العامة ليه يمكن، نظرة مقربة حبتين هتلاقي دراماه تقيلة وقوية، والأهم من ده انها معمولة بشكل كويس جداً، هنا فيه مخرج محنك اشتغل فـ عشرات الفيديو كليبات والأفلام القصيرة وعمل فيلمين لـ(سبايدر مان) معجبوش حد خالص (عجبوني جداً بالمُناسبة) وفيلم مفيش مخلوق بيتفرج عالـ أفلام ميعرفش اسمه قبل ما يوجّه دفّته للفيلم ده .. (مارك ويب) مخرج شاطر فـ القصص العاطفية اللي بيحكيها.. بيعرف يطلع من قصصه دراما تأثر عميقاً فيك.. حتى أفلام سبايدر مان اللي عملها، أفتكر مثلاً اني عيطت جامد فـ الجزء التاني منه لما كنت بشوفه في السينما فـ مشهد لما (ميري جين) بتموت قرب الختام (سبويلر أليرت!!، متهيألي محدش مشفش الفيلم، مش كده ؟!!).. فيه مشهد واحد تحديداً فـ فيلمنا ده صعب ان حد مايلاقيش نفسه غرقان فـ العياط فيه.. أنا بحب نوع الأفلام ده أوي اللي هوا مازج بين البهجة والمتعة والقصص البسيطة القوية اللي فيها روح مميز، زي كل أفلام الإحساس الطيب ولنأخذ فيلم زي (Chef) مثال جيد .. هوا مش فيلم إستثنائي أو ممكن ماتكونش شفته قبل كده لكن مع ذلك انتا حابب تشوفه لأن أجوائه من حين للتاني ممكن تلاقيها سحرتك.. الروح ملموسة أوي فـ الأجواء الأسرية هنا (فيلم تاني مميز فـ الحتة دي هوا فيلم "The Hero" من إنتاجات 2017 برضو).. كمان (الكوميديا) فعالة وأصلية جداً لأننا فـ الآخر بتكلم عن بنت عبقرية بتسخر من غباء الجميع من حواليها تقريباً !، الفيلم مبهج جداً وفيه أكتر من مشهد خلوني أضحك اللي هوا زي العبيط بصوت عالي ! .. كل التفاصيل دي كوم، والكاراكتر اللي مقدماه البنت الصغيرة كوم تاني خالص .. واللاهي أنا مش هتفأجأ لو لقيت البنت اترشحت للأوسكار حتى، لأنها مقدمة أداء أستاذي الصراحة نادراً لما تشوفه فـ فيلم.. وأنا كنت متعشم فـ قصة عن (حياة فتاة عبقرية) من أداء قوي زي ده، بس ده مش فيلمنا هنا.. (حاجات تانية !.. ) كمان الفيلم ممكن يحظى بإعجاب أكتر للناس اللي بيحبوا الرياضيات والحسابات والأرقام، وده يبان فـ المواقف اللي البنت بتحل فيها أسئلة من طراز (حاصل ضرب 157 فـ 35) فـ ثواني معدودة، أو ان أحدى شخصيات الفيلم تقول ان فيه طريقة اخترعها شخص قبلاً -مش فاكر اسمه- لحل خوارزميات الأرقام بشكل أسهل (أي ضرب الأعداد فـ بعض).. (فيلم تاني حلو فـ النقطة دي مفتكرش حد سمع عنه قبل كده حتى اسمه "A Brilliant Young Mind") شخصية كريس إيفانس بتقول للبنت فـ أول الفيلم لما بتقوله (مش عايزه أروح المدرسة، الناس كلها مغفلين هناك).. بيجاوب: (اعملي نفسك فتاة صغيرة !) زي جو المحقق كونان اللي فـ الأصل سينشي كودو وبتاع !.. المهم ان الذكريات اللي ممكن تضرب عند المُشاهد نابعة فـ الأصل من اننا جميعاً كنا فـ المرحلة دي مهما حاولنا -وقتها- نمثل على نفسنا: عيال عبيطة مش فاهمة حاجة فـ الحياة وأي حاجة ميلودرامية محتملة فـ سيناريو قصصنا الحياتية.. حتى لو كنا فلاسفة مُدعين أو عباقرة حقيقيين، احنا في النهاية ما زلنا لم نتعدى العاشرة من العُمر ! خلاصة الكلام : فيلم حلو، يستحق يتشاف.

• 0 مفيد
• 0 غير مفيد

أضف نقد جديد