الحريفة  (2024)  El Harifa

أراء حرة

 [1 نقد]

الحريفة .. السر في التوليفة

• احمد رميح
• 10:33 مساءً - 17 ابريل 2024
• نقد آخر لنفس المستخدم

في 1984 فيلم الحريف لمحمد خان وبطولة عادل امام فشل في السينما كإيرادات ولكن عند عرضه على التلفزيون حقق نجاحًا مدويًا إستدعى رجوع الزعيم عادل أمام عن تنصُله من تلك التجربة وإعترافه بها بعد مرور سنين عديدة، بعد ما كان متبري منه ومن مخرجه محمد خان. وبعد 40 سنه حقق فيلم "الحريفة" إيرادات تاريخية في السينما، تخطت السبعين مليون جنية، وإن كان سبب رئيسي في ده نزول الفيلم في توقيت أعياد الميلاد وأجازة نص العام الدراسي ولكن بالتأكيد مكنش ده بس السبب الرئيسي. من ضمن أسباب نجاح الفيلم في السينمات وإللى...اقرأ المزيد اتوقع انه هيكون سبب كمان في نجاحه اكتر بعد عرضه في التلفزيون وهيبقى من الافلام الرياضية المشهورة زي الحريف والعالمي و4-2-4 وغيرهم، هيكون التوليفة الذكية والجميلة سواء في الحدوتة أو في كيفية إخراجها. " اللعب عن وتر الذكريات " دي أول نقطة استغلها صناع الفيلم وأضافوا لمسات بسيطة ولكنها مؤثرة وكفيلة بمداعبة ذاكرة الجمهور، أولى التفاصيل دي بدأت مع مشهد الحفلة اللي كانت عاملاها والدة " ماجد " بطل الحدوتة إللي بيقوم بدوره نور خالد النبوي، أول أغنية اشتغلت في الحفلة كانت I’ll Survive والاغنية دي من أنجح وأشهر الأغاني في التاريخ ورغم إنها إنتاج 1978 إلا إنها أرتبطت بالفيلم الألفيناتي The Replacements وهو فيلم أمريكي بينتمي لنفس نوعية فيلم الحريفة، الأفلام الرياضية. https://www.youtube.com/watch?v=gYkACVDFmeg وعلى مستوى القصة كان في أكتر من تفصيلة ساعدت صناع العمل على اللعب وتر النوستالجيا (الحنين الى الماضي) إللي بالنسبة لي مرض العصر، خاصة عند أبناء السبعينات والتمانيات، المعذبون في " الأرض ". قصة الفيلم كانت مليانه تفاصيل من كذا عمل فني منهم إللى كان بينتمي لنفس التصنيف (أفلام رياضية – Sports Movie ) زي فيلم الحريف والعالمي وكمان تفاصيل من أشهر إنيمي رياضي لجيل التمانينات " كابتن ماجد "، ومنها اللى كان غير رياضي زي فيلم " لامؤخذة ". ماجد/ نور النبوي كان زي هاني / احمد داش، إبن ايجيبت اللى هينزل مصر ويروح مدرسة حكومي ... الخ من الحدوتة، ومن هناك هيحس أنه غريب – طبعًا – وعشان يلاقي لنفسه مكان وسط المصراوية هيستغل موهبته في لعب الكورة تمام زي ما هاني عمل، لعب كورة وحفظ أغاني المهرجانات وحلق شعره وحفظ أناشيد وقران ....الخ. ومن هنا تبدأ تفصيلة جديدة شبيهه بفيلم الحريف، فارس/عادل إمام اللي بيلعب كورة على فلوس هو وزمايله، عشان يعيشوا منها، وهنا ماجد وزمايله بيتحولوا لفرسان فعلا، لما تبدأ الماتشات اللي بيلعبوها تبقى عشان ظروف زمايله، إللي محبوس في دين غارمات عشان جوازة أخته وإللي والدته محتاجه فلوس لعملية في عينيها وغيرها. ولما يبدأ الموضوع يكبر ويشتركوا في بطولة " الحريفة " بأسم مدرستهم " الأبطال " يلاقي ماجد نفسه قدام طريق ممكن يحقق بيه حلمه أنه يرجع تاني لمساره الطبيعي كلاعب محترف مش هاوي ويرجع ناديه ويحقق حلمه بالإحتراف خارج مصر، فيقنع زمايله انهم يشتركوا في البطولة أملًا انه يرجع ناديه أو يشوفه حد من سماسرة اللاعيبن ويحقق حلمه الأكبر ويحترف بره مصر. وهنا تبدأ تفصيلة من فيلم العالمي إللى كان بطولة يوسف الشريف، ونفس عقدة كابتن "مالك" في العالمي بتحصل مع كابتن "ماجد" في الحريفة وده لما يصطدم مع وكيل أعماله لما يتعارض معاد معسكر المنتخب المصري إستعدادا لماتش مهم في تصفيات كاس العالم ومعاد معسكر فريق فالنسياإللى كان بيلعب له مالك، وفي الحريفة كان معسكر الفريق الأوربي إللي وكيل اللاعبين نادر شوقي قال لماجد انه هيمضي معاهم وهيبدأ بعد يومين حرفيًا وبالتالي ماجد مش هيلحق يلعب نهائي كأس " الأبطال " إللى زمايله اشتركوا فيها مخصوص عشانه في المقام الأول وعشان يكسبوا المليون جنيه ويحلوا كل مشاكلهم . أخر نقطة في اللعب على وتر الذكريات كانت أسماء الشخصيات وإختيار أسماء اتعلق بيها جيل كامل في الكورة وهي كابتن ماجد وصراعه مع كابتن بسام، أختيار الأسماء خدمهم كتير في نقل إحساس الصراع الكروي بين أشهر شخصيتين إنمي في تاريخ كورة القدم، ماجد وبسام، حتى "عُمر" صديق ماجد الأبله في الحريفة واللي كان الشخصية الكوميدية الأبرز في الفيلم كان بيحمل نفس أسم عُمر صديق كابتن ماجد في المسلسل الإنمي واللى لبلاهته دور كبير في خلق المواقف الكوميدية سواء في فيلم الحريفة أو في المسلسل الإنمي، وكان ظهور لاعبين توأم في احد الفرق المنافسة بأسم احمد شوقي ومحمد شوقي إشارة إلى الأخوان شوقي أصحاب الضربة المزدوجة الشهيرة. " الحوار" اللي شفته بيميز فيلم الحريفة كمان غير التوليفة أو الكوكتيل إللي واخد من كل بستان زهرة، كان الحوار،الحوار بين الشخصيات كان حقيقي جدًا وخالي من أي إفتعال وتكلُف وكأنه مكنش مكتوب مسبقًا وكل شخصية بترتجل، حوار عفوي جدًا وأكيد عشان نلمس ونحس عفوية الحوار، كان كاست الفيلم له دور مهم في إنجاح الحوار من خلال أدائهم الصوتي وإنفعالهم خلاله. " المونتاج " كريم سعد مونتير الفيلم ومساعده محمود صلاح كانوا موفقين جدًا ونجحوا في المزج بين لقطات اللعب والأغاني في إختصار مشوار الحريفة في اللعب في كل الساحات الشعبية ووصلهم لأكتر من منطقة وتطور علاقاتهم مع بعض والحفاظ على ايقاع فيلم رياضي كله لعب وترقيص ولحظات نجاح وفرح. " احمد حسام ميدو " إختيار ميدو كان موفق جدًا لأداء شخصية الحكيم أو المُعلم، أغلب القصص السينمائية بيبقى فيه شخصية الحكيم أو المعلم إللي بيلهم البطل / الأبطال أو ناصح أمين ليهم. في تشابه كبير جدًا بين حدوتة أستاذ شلش وحكاية ميدو لاعب الكورة الحقيقي إللي كان عنده فرصه يبقى عالمي أكتر من إللى وصله في الحقيقة وده بيبان في محاضرته ليهم لما كانوا مهزوزين ومستهترين في تاني ماتشات البطولة، المحاضرة كمان وطريقة ميدو أدتني إحساس إنها محاضرة حقيقية وحصلت بالفعل يا إما مع ميدو اللاعب أو مع ميدو المدرب، وأنا شخصيًا لا أستبعد انها تكون محاضرة قالها ميدو قبل كده لفريق من الفرق إللى كان بيدربها. النقطة الوحيدة إللي مكنتش موفقه فنيًا وتم مراعاة فيها الجانب التجاري بشكل كبير هي وجود صورة بيومي فؤاد في بوستر الفيلم رغم أنه ضيف شرف ظهر في آخر 10 دقايق من الفيلم كمُعلق على مباريات البطولة، وكانت غير موفقة أكتر لما بيومي سخر من وجوده وقال "كنت معدي ولقيت زحمه قولت أدخل أشوف ليكون في تصوير من غيري"! فيلم الحريفة تجربة لذيذة ومرحه جدًا والأهم انها كانت توليفة موفقة في المجمل لأنها قدرت تجمع بين أكتر من عمل فني رياضي سابق بدون ما تفقد هويتها وتكون نسخة مكررة للأعمال دي. وده معناه إن صناع الفيلم كان ليهم من أسمه نصيب.

• 2 مفيد
• 1 غير مفيد

أضف نقد جديد