The Lost Bus  (2025)  الحافلة الضائعة

أراء حرة

 [1 نقد]

"The Lost Bus" ...حين تصبح الحافلة طوق نجاة في قلب الجحيم

• دعاء أبو الضياء
• 12:34 مساءً - 7 اكتوبر 2025
• نقد آخر لنفس المستخدم

في زمن بقينا فيه متعودين على أفلام الكوارث، قليل لما تلاقي فيلم يقدر يلمسك فعلاً، لكن فيلم "The Lost Bus" بطولة ماثيو ماكونهي وأمريكا فيريرا، ومن إخراج وتأليف بول جرينجراس، قدر يعمل كده، مش لأنه مختلف تمامًا، لكن لأنه حقيقي، قريب، صادق. مبدائيا القصة مبنية على أحداث حصلت فعلاً وقت حريق كامب فاير في كاليفورنيا سنة 2018، "كيفن ماكاي" (ماكونهي) سواق حافلة مدرسة، شخص عادي جدًا، عنده مشاكل مع ابنه بسبب تركه لفترة من عمره وهو صغير، وعليه ديون كتيرة جدا، لكن لما النار أكلت المدينة، اتحول في لحظة لبطل...اقرأ المزيد من غير ما يخطط، كان عليه ينقذ عدد كبير من الأطفال بالحافلة ومعاهم المدرسة "ماري لودفيج" (فيريرا)، وبدأت رحلتهم وسط الدخان والنار عشان يوصلوا لبر الأمان. الجميل في الفيلم إنه ما حاولش يعملك "مشهد بطولي" بالطريقة الهوليوودية اللي حفظناها، أنت بتحس إنك جوا الموقف فعلًا، كل طريق، كل قرار، كل ثانية بتعدي، تحس بيها كأنك واحد منهم، وهنا كان التصوير عبقري، والمؤثرات البصرية تحسها حقيقة وطبيعية جداـ والكاميرا مش بتستعرض ولا بتحاول تبهر، هي محبوسة معاهم جوه الباص، اللهيب، الدخان، السماء الرمادية... كله معمول بإتقان يخليك تصدق إنك هناك فعلاً، وفي كذا لحظة، نسيت إن ده فيلم وقلبي فعلاً كان بيدق بسرعة. لو اتكملنا عن أداء ماثيو ماكونهي من أكتر الحاجات اللي شدتني، هو أنه ما حاولش يمثل دور "البطل"، بالعكس، كان خائف وتايه، بس مضطر يثبت عشان الأطفال، طريقته في طمأنتهم ولمهم حواليه كانت مؤثرة جدًا، بتحس إنه بيحاول يعوض حاجة في حياته يمكن تجاه ابنه، أو حتى نفسه. وبالرغم من كل الجمال ده اعتقد أن الفيلم كان محتاج يكون أقصر، في نصه بدأت أحس إن بعض المشاهد بتتكرر بنفس الإحساس والزوايا، ومشاهد كتير حلوة، بس الإيقاع بيبطأ لدرجة تخليك تفكر تقوم تجيب حاجة وتشوف باقي الفيلم بعدين. في النهاية، "The Lost Bus" مش مجرد فيلم عن الهروب من النار وبس، هو فيلم عن الناس اللي بيظهر معدنهم الحقيقي وقت الشدة، عن قرارات صغيرة، لكنها ممكن تغير مصير الكل. يمكن مش فيلم هيغير السينما، بس أكيد هيغير نظرتك للناس العادية... اللي في لحظة خطر، بيبقوا أبطال حقيقيين.

• 0 مفيد
• 0 غير مفيد

أضف نقد جديد