عمرو سلامة: "10 أسباب تجعل من أحمد زكي الموهبة الأفضل في التاريخ"

عمرو سلامة

أشاد المخرج السينمائي عمرو سلامة بموهبة الفنان الكبير الراحل أحمد زكي، حيث اعتبر سلامة أن موهبة أحمد زكي تضاهي موهبة كبار ممثلي هوليود على مر التاريخ أمثال دانييل داي لويس و أنتوني هوبكنز و فيليب سيمور هوفمان بل يتفوق عليهم من وجهة نظره.

وكتب عمرو سلامة عبر صفحته الرسمية بموقع فيسبوك: "لماذا أحمد زكي لا يقل عن أي موهبة عالمية. دانييل داي لويس وأنتوني هوبكنز وفيليب سيمور هوفمان في رأيي دول يمكن أهم مواهب تمثيلية في تاريخ السينما، وأستطيع بضمير مستريح أن أقارن أحمد زكي بهم وقد يكون في نفس مستواهم وأعلى لعدة أسباب".

وأوضح عمر في 10 نقاط متتالية أسباب تفوق النجم أحمد زكى على هؤلاء النجوم وتربُّعه كأفضل فنان موهوب على مر التاريخ من وجهة نظره الشخصية، حيث فصَّل هذه النقاط كالتالي:

"أحمد زكي عمل ظابط ٣ مرات، في أفلام الباشا و زوجة رجل مهم و أرض الخوف وكل دور منهم مالوش أي علاقة بالثاني."

"أحمد زكي مستواه ماكنش بيقل لو المخرج اللي كان معاه مش كويس أو حتى السيناريو وحش، مهما كان مستوى الفيلم رديء كان تمثيله في نفس مستواه."

"أحمد زكي لما كان بيعمل لهجة ثانية التمثيل ماكنش بيهرب منه، حتى لو كان بيغني بيها زي مثلا أغنية فيلم البيه البواب أو كابوريا".

"أحمد زكي لما كبر ماستسهلش، كان وهو حتى في أواخر أيامه بيعمل نفس المجهود وبالعكس كان لسة بيتطور."

"أحمد زكي ما خلقش لنفسه (كومفورت زون) أو مساحة الراحة، دور معين أجاده فقعد يعيده علشان خايف يعمل غيره، يعني مثلا مارحش يحاول يعيد شخصية كابوريا حتى مع نجاحها التجاري الساحق."

"أحمد زكي ما كنش بيحور موهبته على حسب نوع التمثيل اللي كان موجود، يعني تمثيله من السبعينات للألفينات نفس الجودة، لا كان بيأفور وقت الأفورة ولا يدعي البساطة وقت ما كان ده الموضة."

"أحمد زكي كان بيمثل وهو بيقلد شخصيات تاريخية من غير ما ييجي التقليد على حساب التمثيل، وديه الحركة المشهورة اللي بتخلي الممثلين الأمريكان ياخدوا أوسكار، معظم جوايز الأوسكار لأحسن ممثل بتروح للممثل اللي بيقلد شخصية تاريخية معروفة بدون ما تهرب منه الشخصية أو يمثل بمستوى أقل علشان يحافظ علي التقليد."

"أحمد زكي عمل كل ده وبقى ممثل في مستوى الممثلين العالميين من غير صناعة كبيرة تسند موهبته، صناعة توفرله كل السبل والظروف المناسبة زي هوليوود، اللي الممثل فيها قبل الدور بيبقى معاه مدرب تمثيل ومدرب على اللهجة و (إيجينت) ممثل له في الإتفاقات ويشير عليه الأدوار اللي مفروض يعملها."

"أحمد زكي ماكنش بيستسهل في الفيلم الكوميدي أو التجاري، كان بيعامل الدور بنفس أهمية الدور اللي بيعمله في فيلم فني أو غير تجاري، يعني ماكنش (بينحت) المصطلح الدارج في الوسط الفني."

"أحمد زكي كان بسهولة ممكن يعمل (اللي بياكل مع الناس) ويعمل بس الأفلام اللي تجيب فلوس والأدوار المبالغ فيها اللي سهل الناس تنبهر بيها، لكنه كان صادق جدا للشخصية اللي كان بيلعبها."