Elysium  (2013)  إليسيوم

أراء حرة

 [1 نقد]

واقعية الخيال العلمي

• دعاء أبو الضياء
• 12:00 صباحًا - 2 اكتوبر 2013
• نقد آخر لنفس المستخدم

تسألني عن إيه هي نوعية الأفلام اللي بفضلها بصفة عامة سواء كانت أجنبية أو عربية؟ وإيه اللي بيشدني وبيبقى ليه الأولوية في مشاهدته؟ … أقولك أي فيلم درامي بيركز على الأبعاد الإنسانية وبيتناول مشاكل البشر بصفة عامة؛ تيجي أفلام الحركة في المرتبة التانية عالطول، ويمكن السبب الأول هو اللي خلاني أبقى متلهفة إني أٌشاهد فيلم Elysium للمخرج (نيل بلومكامب) خاصة لما قريت عن القصة بتناقش فكرة المساواة والعدل؛ فالفيلم بيدور عن الفترة المستقبلية والأرض عام 2159 حيث طبقتان من الناس طبقة ثرية تعيش في محطة...اقرأ المزيد فضائية، وأخرى فقيرة متمثلة في سكان كوكب الأرض الذين يعانون الفقر والجوع والمرض... وضعت قوانين للمنع من السفر هناك، فيقرر أحد الأشخاص يدعى (ماكس) بعد إصابته بالإشعاع بتغيير تلك القوانين وإعادة مبدأ المساواة والعدل مرة أخرى... إذًا القصة بتجمع بين الخيال وبعض الميلودراما اللي بتمثل الواقع الأليم اللي أغلبنا رفضه، وجوا كل ده أبعاد إنسانية وبيئية كثيرة جدا بدًء من التفرقة في المستوى الاجتماعي، والرؤية المتدنية لسكان الأرض، ووواحشية وتعجرف حكام المحطة، ومن خلال كل المعاني السابقة نقدر نمسك خامة جيدة نتكلم عنها وعن قدرة المخرج (بومكامب) في تنفيذ ده بحرافية بالغة فهنشوف التركيز على البيئة والشكل العام للفيلم اللي معاه هتحس انك عايش نفس التجربة ومش بعيد إنك تشم رائحة الإدخنة كمان؛ وكإنك واحد من سكان الطبقة دي ، أيضا الديكورات المستخدمة والخاصة بالمحطة الفضائية اللي إن دلت تدل على الفرق الكبير في الرفاهية والاحساس إن في بشر عندهم كل شيء في الوقت اللي هناك أخرين لا يملكون حتى استنشاق هواء نظيف، ولو طرقت الفكرة عقل الطبقة الأخرى باختراق المحطة فالموت واﻹبادة هي النهاية الحتمية والمنتظرة لهم... إحساس الواقعية اللي حاول المخرج نيل توصيله بتتأكد منه لما تعرف إنه بالفعل قام بتصوير بعض المشاهد الخاصة بسكان الأرض في أماكن النفايات بالمكسيك ﻹضفاء جوا الواقعية والتأثير المباشر على المشاهد، في الوقت اللي قدر فيه أيضا إنه يقدم صورة فائقة الجمال والخيال عن الأثرياء سكان المحطة الفضائية، أول ما لفت نظري في الأداء التمثيلي كان أداء الممثلة الجميلة (جودي فوستر) واللي قدمت دور الوزيرة المسئولة عن المحطة، وإزاي قدرت بالرغم من ملامحها البسيطة إنها تغيرها لملامح شديدة مالت إلى الجبروت والتوحش، كمان أداء الممثل (مات دايمون) اعتقد إنه لا يقل في وصفه عن أداء جودي وإحساسه بمن مثله بالرغم من إنه لم يستغل الفرصة التي أتيحت له فقط وقرر التضحية بنفسه من أجل مستقبل سكان الأرض ومن أجل صديقته وابنتها وتحقيق مبدأ المساواة والعدل اللي حرم منهم... فيلم Elysium بيعتبر ثاني فيلم للمخرج نيل بلومكامب بيتكلم فيه عن الخيال العلمي بعد فيلمه District 9 واللي قدر من خلاله يحقق إيرادات عالية جدا وقتها تقريبا تعدت 115 مليون دولار، وبالرغم من إن الفيلم خيالي من الدرجة الأولى إلا أن (نيل) معتمدتش فيه بشكل كبير على المؤثرات البصرية وترك خيال المشاهد يسبح معاه لأبعد الحدود، وإن نسبة العنف والحركة والمعارك كانت ضئيلة ولا تذكر بالمرة إلا في العشر دقائق الأخيرة من الفيلم. الفيلم شيق جدا ويستحق إنك تشاهده ومش هيخيب أمل الجمهور اللي مش بيحب أفلام الخيال العلمي أو بيمل أكتر لأفلام الدراما زي كدا.

• 1 مفيد
• 0 غير مفيد

أضف نقد جديد